استخبار
في الجسم القلب سلطان و
بالحق العقل وزيره
اذا عاد القلب ضعيف عيان الارادة تعود لغيره
اذا عاد القلب ضريف مزيان يتفاهموا كيفاش يديروا
انا شفت من بكري و زمان شحال من سلطان و وزيره
...ماشيين
بالامان و على بعضهم يغيروا
و في هاذ الزمان يعرفوا كيفاش يديروا
خماسة
نتحدث معاك يا قلبي انت هو سلطان الذات
حشمتك بالنبي العربي راك عييتني و بركات
جيت في وسط الصدر مخبي لوكان جيت برا لوكان فرات
نديرك كي التزدام في جيبي نتصرف بعقلي اذا ولات
بعقلي يا قلبي نتصرف و معاك فرات
* انت اللي حبيت وبليتني سهرتني على النجوم
شحال من ليالي خلويتني نبات معاك نهوم
لعبت بالجمر و كويتني منك رجعت مغروم
حرمتلي النوم من عيني و نار الحب قدات
* ما دريتش كيفاش خبرتني و خبارك قاع غرور
اللي نهواها ما جاتني و الغايب ديمة معذور
باقي صايم مستني من الصبح حتى للسحور
لا احد جاني و لا شافني فاتوا سوايع و اوقات
* ما دريتش كيفاش سحرتني قلبتلي الظلمة نور
فوق النخلة ركبتني شفنا لالة البدور
تهزيت يا قلبي و طيحتني و بقيت في الارض مكسور
عدت يا جبار اجبرني و حنا عند الممرضات
* في ذاك العام قلقتني بغيت تحوس البرور
نخاف من الغميق و عومتني و قطعت بيا البحور
شرقتني و غربتني خليتني غير ندور
يا قلبي وين ارميتني في بحر بلا موجات
* ما دريتش كيفاه هولتني منك جرعت المرور
مع ساقي الكاس قعدتني شربتني من الخمور
سكرتني و رجعت نغني بسري و نعيط بالزور
اللي ما عرفني اسمعني لحقتني للكشفات
* ما دريتش كيفاه طنعتني و اتيت انا مامور
عند الطالب لحقتني بداني جاوي و بخور
فتح الباب و فهمني و قالي يا ابني راك مسحور
ومن بعد زدت وصلتني حتى للشوافات
* اذا كانك طماع اطمع في الله الغالي
اذا دعيته سماع من غيره ما عندك والي
الى ذكر الله ارجع و يزينا من المحالي
غير الصح اللي ينفع الخمسة و خمس اوقات
*محمد الباجي-رحمه الله
