ياحسراه عليك ياالدنيا فيك حكاية وحكايات
ساميني واقعدي حذايا واحكيهم لي بثبات
علاش هكذا حاقدة وسمية تظلي تبدلي في الصفات
تعذبي فيا غير بالشوية عييت من عذابك بركات
تلعبي بيا ولا معايا جاوبيني علاش هذا السكات
قالولي عليك مسرحية انا المسرح سكنلي في الذات
التذكرة خلصتها غالية اديت معايا شي وردات
دخلت للقاعة صفقوا عليا طلع الستار والاضواء طفات
لقيت روحي في تمثيلية والديكور خوف ودموع
طمعتيني ودرتي عليا عندي جدي بصح مات
شحال من سلطان كان في الدنيا جيوش لامروا طيعات
مال وعز قصور وسرايا العسة عليه بالاولوفات
غفل غفلة تقلبت الحية في ليلتو ماصاب وين يبات
اكلتي فلان عسل وفاكهة وفلان شمختيلوا الفتات
فلان قلعتيلوا الذرية وحياتوا من الفرحة خوات
وفلان طلق مرتوا المزكية زعف كي جابتلوا البنات
المسجون يرجوا الحرية بالدقيقة يحسب الاوقات
الشهار يحلم بالشهرية يا حليلوا مولى وليدات
كبدة لميمة مشوية واش سهرت وواش ربات
على وليدها بدل الجنسية غروا زين الروميات
خلى يماه وحدانية من الحرقة والبكاء تعمات
باش يبين الرجولية بعثلها زوج محرمات
نهار كانت الدنيا دنيا الوالدين علقولهم شيعات
واليوم الوالدين راهي مرميا في مراكز الشيخوخات
انتي دنيا يدك زهرية انا يدي فيها الكيات
مع الواقف درتي جمعية سماها دخلات وخرجات
الgليل بعثتيلوا خطية جا يصلي تلفتلو الصلاة
كي سلم نسى التحية كي تحى نسا زوج ركعات
المال فاني والعظام راشية فاتت اجناس واتمحات
لي كان تقي ودار النية طاع ربي وشد في الصلاة
درجتو في الجنة عالية صفت الجنة درجات
الشاقي يمضي النهاية ذاتو في النار التكسات
جلدة رايحة وجلدة جاية يضل يبدل في الجلدات
نصحتى نتركها التالية باش نختم بها البيات
دعوت الوالدين رسمية منهم الشر والخيرات
لهنا كنز والصحة غالية والباقي كل كذوبات
ياسين ارسلها تحية ومضى فيها بشي دمعات
عطها لكمال مسعودي برية قراها وطارو الاف
الصلاة على نور عينيا سيد الخلق يا سدات
شكون لي نجى منك يا دنيا غير لي طلقك بالثلاث