يا الدُّنيا شْبعت فيك هموم

حالك صْعيب في راسي عيَّاني
شرَّبتيني بيديك السُّموم
الماضي راح وراني منُّو نعاني
خلاص اليوم مانيش مغروم
الِّي نحبُّو فيك يروح وينساني
صابر شحال وضُّرِّي مكتوم
ما داري بحالي غير الفوقاني
ما بقات النيَّة والصدق معدوم
واش الِّي صرا في آخر زماني
يا الدُّنيا ما كان فيك يدوم
غير صالح الأعمال و الإحساني
الي يحلم فيك راه يدسه النوم
طاغي في الدنيا غاويه الشيطاني
ومن تبَّع فيك الطريق المعلوم
ربِّي يكافيه بجنة الرضواني
طايع الله يصلي ويصوم
ما هو ظالم لا سارق ولا زاني
يا الله راني تبت ليك اليوم
اغفر لي وقلبي قويه بالإيماني
اهديني واهدي قاع القوم ونجينا من عذاب النيراني.